Pages

Bhutan News Service

Bhutan News Service

भूकम्पले एक जनाको ज्यान लियो, अरु चार घाइते

Posted: 20 Sep 2011 09:20 AM PDT

भारतको सिक्किममा केन्द्र रहेको ६.८ रिक्टर स्केलको शक्तिशाली भूकम्पले भूटानमा कम्तिमा एक जनाको ज्यान लिएको छ भने चार जना घाइते भएका छन् ।

पछिल्लो चोटी प्राप्त समाचारअनुसार भूकम्पमा परी छुकामा खोलाबाट पानी ल्याउने क्रममा एक जना ४३ वर्षीय महिलाको ज्यान गएको छ । उनी झर्दै गरेका चट्टानहरुको प्रहारमा परेकी थिइन् ।

प्रभावित क्षेत्रहरु

अरु चार जना घाइतेहरु उत्तरी भूटानको हा जिल्लाका बासिन्दा रहेका छन् । उनीहरुको नेसनल रेफरल हस्पिटल, थिम्पुमा उपचार भैरहेको छ । सख्त घाइते भएका तीन जना महिला भाषा तथा संस्कृति संस्थान, सिम्थोखाका विद्यार्थी भएको जनाइएको छ ।

भूकम्पका कारण पारोमा ताजोंगले केही संरचनात्मक क्षति बेहोरेको छ भने फुन्छोलिंगमा केही भवनहरु चर्किएका छन् ।

फुन्छोलिंगमा भू-क्षयले अस्पतालतर्फ गुड्दै गरेको एउटा कार पुरिदिएको छ । कारका चालक भने उम्कन सफल भएका छन् ।

दागानामा भूकम्पले लेजाब गाउँको फुन्सुम सामुदायिक प्राथमिक विद्यालयमा क्षति पुर्याएको छ ।

उता साम्चीमा करिव एक दर्जन घरहरुमा क्षति पुगेको छ भने बारामा केही घरहरु ढलेका छन् ।

छुकामा चार वटा विद्यालय, तीनवटा प्राथमिक स्वास्थ्य चौकी र तीनवटा आरएनआर केन्द्रहरु क्षतिग्रस्त भएका छन् ।

उता दागानामा दुईवटा आरएनआर केन्द्र, तीनवटा विद्यालय, पांचवटा सामुदायिक केन्द्र र एउटा प्राथमिक स्वास्थ्य चौकीमा क्षति पुगेको छ ।

सिक्किमको राजधानी गान्तोकदेखि करिव ६४ कि.मि टाढा प्रमुख केन्द्र रहेको उक्त भूकम्पले पूर्वी भारत, भुटान र नेपालमा धेरै जनाको ज्यान लियो, सैयौंलाई घाइते बनायो अनि असंख्य पूर्वाधारहरुमा क्षति पुर्यायो । फोनको नेटवर्कसमेत अवरुद्ध भएकाले यकिन विवरण अझैसम्म प्राप्त भैसकेको छैन ।

यसैबीच, प्रधानमन्त्री जिग्मी वाई थिन्लेले अरु सम्भावित प्रकोपहरुबाट भगवानले रक्षा गर्छन् भन्दै फेसबुकमार्फत देशबासीहरुलाई शान्त रहन आग्रह गरेका छन् ।